hamin pe ranj-o-alam go hazar guzre hain

hamīñ pe ranj-o-alam go hazār guzre haiñ

jahāñ se guzre haiñ ham naġhma-bār guzre haiñ

harīm-e-nāz se ham hoshiyār guzre haiñ

magar vo dil se to be-iḳhtiyār guzre haiñ

zabāñ zabāñ pe hai mehr-o-vafā ke afsāne

jahāñ jahāñ se tire jāñ-nisār guzre haiñ

nazar nazar ne hai chūmā diloñ ne chāhā hai

jo rahguzar se tirī dil-figār guzre haiñ

ḳhayāl-o-fikr kī vo rif'atoñ ko chhū ke ga.e

tirī nazar se jo ye ḳhāksār guzre haiñ

mahak mahak sī ga.ī bū-e-pairahan se fazā

ki aaj idhar se vo jān-e-bahār guzre haiñ

ye ḳhūn-e-dil hai jo āñkhoñ kī raah bah niklā

kahā ye kis ne ki ham ashk-bār guzre haiñ

rulā.e kyoñ na hameñ ab qafas meñ yaad un kī

vo raat din jo sar-e-shāḳh-sār guzre haiñ

'habīb' merī nigāhoñ se ho vo laakh nihāñ

vo mere dil se magar baar baar guzre haiñ

hamin pe ranj-o-alam go hazar guzre hain

jahan se guzre hain hum naghma-bar guzre hain

harim-e-naz se hum hoshiyar guzre hain

magar wo dil se to be-iKHtiyar guzre hain

zaban zaban pe hai mehr-o-wafa ke afsane

jahan jahan se tere jaan-nisar guzre hain

nazar nazar ne hai chuma dilon ne chaha hai

jo rahguzar se teri dil-figar guzre hain

KHayal-o-fikr ki wo rif'aton ko chhu ke gae

teri nazar se jo ye KHaksar guzre hain

mahak mahak si gai bu-e-pairahan se faza

ki aaj idhar se wo jaan-e-bahaar guzre hain

ye KHun-e-dil hai jo aankhon ki rah bah nikla

kaha ye kis ne ki hum ashk-bar guzre hain

rulae kyon na hamein ab qafas mein yaad un ki

wo raat din jo sar-e-shaKH-sar guzre hain

'habib' meri nigahon se ho wo lakh nihan

wo mere dil se magar bar bar guzre hain