hamin to hain jo tere sath chalte rahte hain

hamīñ to haiñ jo tire saath chalte rahte haiñ

vagarna log to raste badalte rahte haiñ

kabhī zamāne kā ġham hai kabhī tumhārā ġham

ġhazal sunāne ke pahlū nikalte rahte haiñ

nazar to aate haiñ ab phūl-phal daraḳhtoñ par

ye aur baat ki ham haath malte rahte haiñ

ye apnī marzī ke mālik haiñ in se kuchh na kaho

purāne log haiñ girte sambhalte rahte haiñ

ajab udāsī meñ ab ke guzar rahe haiñ din

jo kaam aaj ke haiñ kal pe Talte rahte haiñ

koī charāġh sar-e-rahguzar bhī raushan ho

muñDer par to diye sab kī jalte rahte haiñ

jhulastī ret pe ik buuñd hī uchhāl kabhī

ye bārishoñ meñ to dariyā ubalte rahte haiñ

na aa.e vo lab-e-iz.hār tak kabhī 'fārūq'

ki jazbe dil meñ to aksar machalte rahte haiñ

hamin to hain jo tere sath chalte rahte hain

wagarna log to raste badalte rahte hain

kabhi zamane ka gham hai kabhi tumhaara gham

ghazal sunane ke pahlu nikalte rahte hain

nazar to aate hain ab phul-phal daraKHton par

ye aur baat ki hum hath malte rahte hain

ye apni marzi ke malik hain in se kuchh na kaho

purane log hain girte sambhalte rahte hain

ajab udasi mein ab ke guzar rahe hain din

jo kaam aaj ke hain kal pe Talte rahte hain

koi charagh sar-e-rahguzar bhi raushan ho

munDer par to diye sab ki jalte rahte hain

jhulasti ret pe ek bund hi uchhaal kabhi

ye barishon mein to dariya ubalte rahte hain

na aae wo lab-e-izhaar tak kabhi 'faruq'

ki jazbe dil mein to aksar machalte rahte hain