hamrah chal raha tha magar dekhta na tha

hamrāh chal rahā thā magar dekhtā na thā

jaise ki vo kabhī kā mirā āshnā na thā

saare badan meñ aag kī lapTeñ savār thiiñ

dariyā meñ kūdne ke sivā rāsta na thā

ḳhvāboñ ke par jale hue bikhre the chār-sū

aḳhbār kah rahā hai koī ghar jalā na thā

ham apne ġham-kade se nikalte to kis tarah

taale paḌe hue the koī dar khulā na thā

tanhā.iyoñ meñ baiTh ke piite rahe haiñ log

ik aisā zahr jis kā koī zā.iqa na thā

ik dūsre se duur rahe ham tamām 'umr

vaise hamāre biich koī fāsla na thā

vo din bhī yaad hai ki isī shahr meñ 'shamīm'

maiñ kho gayā thā aur koī DhūñDhtā na thā

hamrah chal raha tha magar dekhta na tha

jaise ki wo kabhi ka mera aashna na tha

sare badan mein aag ki lapTen sawar thin

dariya mein kudne ke siwa rasta na tha

KHwabon ke par jale hue bikhre the chaar-su

aKHbar kah raha hai koi ghar jala na tha

hum apne gham-kade se nikalte to kis tarah

tale paDe hue the koi dar khula na tha

tanhaiyon mein baiTh ke pite rahe hain log

ek aisa zahr jis ka koi zaiqa na tha

ek dusre se dur rahe hum tamam 'umr

waise hamare bich koi fasla na tha

wo din bhi yaad hai ki isi shahr mein 'shamim'

main kho gaya tha aur koi DhunDhta na tha