hans de to khile kaliyan gulshan mein bahaar aae

hañs de to khile kaliyāñ gulshan meñ bahār aa.e

vo zulf jo lahrā.eñ mausam meñ nikhār aa.e

mil jaa.e koī sāthī har ġham ko sunā Dāleñ

bechain mirā dil hai pal bhar ko qarār aa.e

mad.hosh huā dil kyuuñ bechain hai kyuuñ āñkheñ

huuñ duur mai-ḳhāne se phir kyuuñ ai ḳhumār aa.e

khil jā.eñgī ye kaliyāñ mahbūb ke aamad se

jis raah se vo guzre gulshan meñ bahār aa.e

jin jin pe ināyat hai jin jin se mohabbat hai

un chāhne vaalo meñ merā bhī shumār aa.e

phūloñ ko sajāyā hai palkoñ ko bichhāyā hai

ai bād-e-sabā kah de ab jaane bahār aa.e

bulbul meñ chahak tum se phūloñ meñ mahak tum se

ruḳhsār pe kaliyoñ ke tum se hī nikhār aa.e

hans de to khile kaliyan gulshan mein bahaar aae

wo zulf jo lahraen mausam mein nikhaar aae

mil jae koi sathi har gham ko suna Dalen

bechain mera dil hai pal bhar ko qarar aae

madhosh hua dil kyun bechain hai kyun aankhen

hun dur mai-KHane se phir kyun ai KHumar aae

khil jaengi ye kaliyan mahbub ke aamad se

jis rah se wo guzre gulshan mein bahaar aae

jin jin pe inayat hai jin jin se mohabbat hai

un chahne walo mein mera bhi shumar aae

phulon ko sajaya hai palkon ko bichhaya hai

ai baad-e-saba kah de ab jaane bahaar aae

bulbul mein chahak tum se phulon mein mahak tum se

ruKHsar pe kaliyon ke tum se hi nikhaar aae