hans kar aansu pine wale dard baTane wale log

hañs kar aañsū piine vaale dard baTāne vaale log

baad hamāre tum DhūñDoge naaz uThāne vaale log

mausam badlā patjhaḌ aa.ī panchhī uḌ ga.e shāḳhoñ se

saath rahe haiñ saath raheñge saath nibhāne vaale log

baat kahī kyā ḳhuub kisī ne maiñ dohrā.e detā huuñ

dost nahīñ hote haiñ saare haath milāne vaale log

dushman ke zaḳhmoñ pe marham aap lagā.eñ baḌh-chaḌh kar

jiit se gar vāqif ho jaa.eñ jiit manāne vaale log

sāhil hai in.aam unhī kā jo tūfān se laḌte haiñ

rizq-e-dariyā ho jaate haiñ shor machāne vaale log

tum ne rāteñ so kar kāTīñ aur din bhar ārām kiyā

sūraj chāñd sitāre laa.e ḳhaak uḌāne vaale log

mīloñ chal kar ā.eñge taare hamārī chaukhaT par

go ham ko pahchān na paa.e aaj zamāne vaale log

hans kar aansu pine wale dard baTane wale log

baad hamare tum DhunDoge naz uThane wale log

mausam badla patjhaD aai panchhi uD gae shaKHon se

sath rahe hain sath rahenge sath nibhane wale log

baat kahi kya KHub kisi ne main dohrae deta hun

dost nahin hote hain sare hath milane wale log

dushman ke zaKHmon pe marham aap lagaen baDh-chaDh kar

jit se gar waqif ho jaen jit manane wale log

sahil hai inam unhi ka jo tufan se laDte hain

rizq-e-dariya ho jate hain shor machane wale log

tum ne raaten so kar kaTin aur din bhar aaram kiya

suraj chand sitare lae KHak uDane wale log

milon chal kar aaenge tare hamari chaukhaT par

go hum ko pahchan na pae aaj zamane wale log