hansi mein Tal rahe ho tum uske rone ko

hañsī meñ Taal rahe ho tum us ke rone ko

na dekhtā ho vo hone se pahle hone ko

salām bhuuk ko un kī karo jinhoñ ne kabhī

bachā.e rakkhā thā thoḌā anaaj bone ko

diye ga.e haiñ ḳhazāne unhī ko ahd-ba-ahd

rahā thā kuchh bhī nahīñ jin ke paas khone ko

ġhalat nahīñ ki lagātī haiñ paar maujeñ bhī

jo jāntī haiñ faqat Dūbne Dubone ko

bikharnā ye hai ki māyūs lauT jaatī hai

jo raat aatī hai mujh meñ mujhe samone ko

jo aaj dekho to baiThe haiñ nīl-kañTh bane

ga.e the ham bhī samundar kabhī bilone ko

pata chalā ki ye āñkheñ milī haiñ us ke liye

shab-e-firāq ke gul raat bhar pirone ko

kuchh āñsuoñ se hī nikle to nikle kaam koī

vo daaġh huuñ ki samundar bhī kam haiñ dhone ko

hansi mein Tal rahe ho tum us ke rone ko

na dekhta ho wo hone se pahle hone ko

salam bhuk ko un ki karo jinhon ne kabhi

bachae rakkha tha thoDa anaj bone ko

diye gae hain KHazane unhi ko ahd-ba-ahd

raha tha kuchh bhi nahin jin ke pas khone ko

ghalat nahin ki lagati hain par maujen bhi

jo jaanti hain faqat Dubne Dubone ko

bikharna ye hai ki mayus lauT jati hai

jo raat aati hai mujh mein mujhe samone ko

jo aaj dekho to baiThe hain nil-kanTh bane

gae the hum bhi samundar kabhi bilone ko

pata chala ki ye aankhen mili hain us ke liye

shab-e-firaq ke gul raat bhar pirone ko

kuchh aansuon se hi nikle to nikle kaam koi

wo dagh hun ki samundar bhi kam hain dhone ko