hanso na tum ruKH-e-dushman jo zard hai yaro

hañso na tum ruḳh-e-dushman jo zard hai yaaro

kisī kā dard ho apnā hī dard hai yaaro

diloñ se shikva-e-bāham ko duur karne meñ

lagegā vaqt ki barsoñ kī gard hai yaaro

ham ahl-e-shahr kī fitrat se ḳhuub vāqif hai

vo ik ġharīb jo sahrā-navard hai yaaro

jahāñ mata-e-hunar kī ḳharīd hotī thī

bahut dinoñ se vo bāzār sard hai yaaro

ajab nahīñ ki bayābāñ ke hoñT tar ho jaa.eñ

fazā meñ aaj samundar kī gard hai yaaro

ḳhatā kisī se huī ho koī bhī mujrim ho

javāb-dah to yahāñ fard fard hai yaaro

ḳhayāl-e-sūd na adnesha-e-ziyāñ koī

'shamīm' bhī koī āzād mard hai yaaro

hanso na tum ruKH-e-dushman jo zard hai yaro

kisi ka dard ho apna hi dard hai yaro

dilon se shikwa-e-baham ko dur karne mein

lagega waqt ki barson ki gard hai yaro

hum ahl-e-shahr ki fitrat se KHub waqif hai

wo ek gharib jo sahra-naward hai yaro

jahan mata-e-hunar ki KHarid hoti thi

bahut dinon se wo bazar sard hai yaro

ajab nahin ki bayaban ke honT tar ho jaen

faza mein aaj samundar ki gard hai yaro

KHata kisi se hui ho koi bhi mujrim ho

jawab-dah to yahan fard fard hai yaro

KHayal-e-sud na adnesha-e-ziyan koi

'shamim' bhi koi aazad mard hai yaro