hansti hui tanha wo dariche mein khaDi hai

hañstī huī tanhā vo darīche meñ khaḌī hai

laḌkī hai ki tarshe hue hīroñ kī laḌī hai

sone kā ye andāz hai ḳhafgī kī 'alāmat

chehra kiye dīvār kī jānib vo paḌī hai

kohre meñ ghirī shaam kī Dolī se utar kar

tanhā.ī kī chaukhaT pe tirī yaar khaḌī hai

dil 'umr ke qānūn kā qaa.il nahīñ varna

ehsās use bhī hai ki vo mujh se baḌī hai

āñkhoñ meñ tire ġham kā hai hañstā huā mausam

dil meñ tirī yādoñ kī harī fasl khaḌī hai

pābandi-e-auqāt huī us se na hogī

har chand ki nāzuk se kalā.ī meñ ghaḌī hai

maqtūl ko kar aa.e jahāñ dafn 'qamar' log

talvār bhī qātil kī vahīñ par to gaḌī hai

hansti hui tanha wo dariche mein khaDi hai

laDki hai ki tarshe hue hiron ki laDi hai

sone ka ye andaz hai KHafgi ki 'alamat

chehra kiye diwar ki jaanib wo paDi hai

kohre mein ghiri sham ki Doli se utar kar

tanhai ki chaukhaT pe teri yar khaDi hai

dil 'umr ke qanun ka qail nahin warna

ehsas use bhi hai ki wo mujh se baDi hai

aankhon mein tere gham ka hai hansta hua mausam

dil mein teri yaadon ki hari fasl khaDi hai

pabandi-e-auqat hui us se na hogi

har chand ki nazuk se kalai mein ghaDi hai

maqtul ko kar aae jahan dafn 'qamar' log

talwar bhi qatil ki wahin par to gaDi hai