haq kaha dar pe jis ne wo bashar kaisa tha

haq kahā daar pe jis ne vo bashar kaisā thā

sach batāo mujhe vo ahl-e-nazar kaisā thā

shahr-e-āshob likhā jis ke liye logoñ ne

kaise bāshinde the us ke vo nagar kaisā thā

jal gayā raakh huā yuuñ to nasheman ujḌā

dekhne vaalo kaho raqs-e-sharar kaisā thā

shāḳh par jitne parinde the sabhī chīḳh paḌe

TūTne vaalā na-jāne vo shajar kaisā thā

dāstān-e-ġham-o-ālām mirī jhuuT sahī

tere chehre pe vo tā-der asar kaisā thā

jab nazar us pe paḌī aur mirā dil dhaḌkā

kaun thā us meñ ḳhudā jaane vo ghar kaisā thā

kyā koī hādsa-e-maut huā thā vāqe'

ik hujūm aaj sar-e-rāhguzar kaisā thā

tum ne dekhā thā 'jamālī' ko sunāo logo

haañ vo shā'ir na sahī ahl-e-nazar kaisā thā

haq kaha dar pe jis ne wo bashar kaisa tha

sach batao mujhe wo ahl-e-nazar kaisa tha

shahr-e-ashob likha jis ke liye logon ne

kaise bashinde the us ke wo nagar kaisa tha

jal gaya rakh hua yun to nasheman ujDa

dekhne walo kaho raqs-e-sharar kaisa tha

shaKH par jitne parinde the sabhi chiKH paDe

TuTne wala na-jaane wo shajar kaisa tha

dastan-e-gham-o-alam meri jhuT sahi

tere chehre pe wo ta-der asar kaisa tha

jab nazar us pe paDi aur mera dil dhaDka

kaun tha us mein KHuda jaane wo ghar kaisa tha

kya koi hadsa-e-maut hua tha waqe'

ek hujum aaj sar-e-rahguzar kaisa tha

tum ne dekha tha 'jamali' ko sunao logo

han wo sha'ir na sahi ahl-e-nazar kaisa tha