حقیقت جب بیاں ہوگی تو پیدا تلخیاں ہوں گی

حقیقت جب بیاں ہوگی تو پیدا تلخیاں ہوں گی

تعجب کیا نتیجے میں اگر خونریزیاں ہوں گی

اگر فرعون پیدا ہو تو موسیٰ کو بھی آنا ہے

اجالے کا جنم ہوگا اگر تاریکیاں ہوں گی

زمانہ اس کے کردار و عمل سے منحرف ہوگا

کسی کے خون میں شامل اگر چنگیزیاں ہوں گی

ہمارا وقت آئے گا مگر امن و اماں لے کر

تمہارا دور ہے معلوم ہے خونریزیاں ہوں گی

ہم اتنا جانتے ہیں ہم بغاوت کرنے والے ہیں

نہ جانے کس قدر ہم پر ستم انگیزیاں ہوں گی

تشدد سہنے والے ہی بغاوت کرتے آئے ہیں

نہ سمجھو راکھ ان کو راکھ میں چنگاریاں ہوں گی

بہا لے جائیں گی موجیں سبھی کچے مکانوں کو

نشاں تک بھی نہ ہوگا وہ تلاطم خیزیاں ہوں گی

میں ملبے میں بھی پہچانوں گا اپنوں کی دبی لاشیں

کہیں تو جسم سے لپٹی ہوئی کچھ دھجیاں ہوں گی

ہمارا حوصلہ کتنا ہے یہ ساحل بتا دے گا

وہاں جلتی ہوئی ساری کی ساری کشتیاں ہوں گی

ہم ایسے پستہ قد کی سمت احسنؔ کون دیکھے گا

جہاں پر شہر کی اونچی سے اونچی ہستیاں ہوں گی