haqiqat jab bayan hogi to paida talKHiyan hongi

haqīqat jab bayāñ hogī to paidā talḳhiyāñ hoñgī

ta.ajjub kyā natīje meñ agar ḳhūñ-reziyāñ hoñgī

agar fir.aun paidā ho to muusā ko bhī aanā hai

ujāle kā janam hogā agar tārīkiyāñ hoñgī

zamāna us ke kirdār-o-amal se munharif hogā

kisī ke ḳhuun meñ shāmil agar changeziyāñ hoñgī

hamārā vaqt aa.egā magar amn-o-amāñ le kar

tumhārā daur hai ma.alūm hai ḳhūñ-reziyāñ hoñgī

ham itnā jānte haiñ ham baġhāvat karne vaale haiñ

na jaane kis qadar ham par sitam-angeziyāñ hoñgī

tashaddud sahne vaale hī baġhāvat karte aa.e haiñ

na samjho raakh in ko raakh meñ chingāriyāñ hoñgī

bahā le jā.eñgī maujeñ sabhī kachche makānoñ ko

nishāñ tak bhī na hogā vo talātum-ḳheziyāñ hoñgī

maiñ malbe meñ bhī pahchānūñgā apnoñ kī dabī lāsheñ

kahīñ to jism se lipTī huī kuchh dhajjiyāñ hoñgī

hamārā hausla kitnā hai ye sāhil batā degā

vahāñ jaltī huī saarī kī saarī kashtiyāñ hoñgī

ham aise pasta-qad kī samt 'ahsan' kaun dekhegā

jahāñ par shahr kī ūñchī se ūñchī hastiyāñ hoñgī

haqiqat jab bayan hogi to paida talKHiyan hongi

tajjub kya natije mein agar KHun-reziyan hongi

agar firaun paida ho to musa ko bhi aana hai

ujale ka janam hoga agar tarikiyan hongi

zamana us ke kirdar-o-amal se munharif hoga

kisi ke KHun mein shamil agar changeziyan hongi

hamara waqt aaega magar amn-o-aman le kar

tumhaara daur hai malum hai KHun-reziyan hongi

hum itna jaante hain hum baghawat karne wale hain

na jaane kis qadar hum par sitam-angeziyan hongi

tashaddud sahne wale hi baghawat karte aae hain

na samjho rakh in ko rakh mein chingariyan hongi

baha le jaengi maujen sabhi kachche makanon ko

nishan tak bhi na hoga wo talatum-KHeziyan hongi

main malbe mein bhi pahchanunga apnon ki dabi lashen

kahin to jism se lipTi hui kuchh dhajjiyan hongi

hamara hausla kitna hai ye sahil bata dega

wahan jalti hui sari ki sari kashtiyan hongi

hum aise pasta-qad ki samt 'ahsan' kaun dekhega

jahan par shahr ki unchi se unchi hastiyan hongi