haqiqat mein wahi ek shaKHs hai duniya mein farzana

haqīqat meñ vahī ik shaḳhs hai duniyā meñ farzāna

jise tum aa.e din kahte ho ye hai koī dīvāna

bharam qaa.em hai tere naam se donoñ kā duniyā meñ

haqīqat meñ tirā maskan na ka.aba hai na but-ḳhāna

dil-e-shaidā kī fitrat ko koī samjhe to kyā samjhe

ye farzāne kā farzāna ye dīvāne kā dīvāna

mohabbat ne lagā dī aag donoñ ko barābar kī

idhar to sham.a jaltī hai udhar jaltā hai parvāna

na pūchho ham se andāza ye hai tauhīn piine kī

hamāre mai-kade meñ koī shīsha hai na paimāna

razā-kārān-e-ulfat maut se ḳhā.if nahīñ hote

hamesha aag hī se kheltā rahtā hai parvāna

mazammat mai kī karne aa.e ho maiḳhāne meñ vaa.iz

zarā socho to ye bhī kaam hai koī sharīfāna

tamannā hūr-o-ġhilmāñ kī mubārak ho tujhe vaa.iz

hameñ tū ye batā jannat meñ hogā koī mai-ḳhāna

parā.ī aag meñ jalnā bahut dushvār hai 'sāhir'

ye kaam insāñ ko lāzim thā magar kartā hai parvāna

haqiqat mein wahi ek shaKHs hai duniya mein farzana

jise tum aae din kahte ho ye hai koi diwana

bharam qaem hai tere nam se donon ka duniya mein

haqiqat mein tera maskan na kaba hai na but-KHana

dil-e-shaida ki fitrat ko koi samjhe to kya samjhe

ye farzane ka farzana ye diwane ka diwana

mohabbat ne laga di aag donon ko barabar ki

idhar to shama jalti hai udhar jalta hai parwana

na puchho hum se andaza ye hai tauhin pine ki

hamare mai-kade mein koi shisha hai na paimana

raza-karan-e-ulfat maut se KHaif nahin hote

hamesha aag hi se khelta rahta hai parwana

mazammat mai ki karne aae ho maiKHane mein waiz

zara socho to ye bhi kaam hai koi sharifana

tamanna hur-o-ghilman ki mubarak ho tujhe waiz

hamein tu ye bata jannat mein hoga koi mai-KHana

parai aag mein jalna bahut dushwar hai 'sahir'

ye kaam insan ko lazim tha magar karta hai parwana