haqiqaton ka na parda abhi uThana tha

haqīqatoñ kā na parda abhī uThānā thā

ḳhayāl-o-ḳhvāb kā manzar baḌā suhānā thā

talab key raah meñ thī ārzū-e-dil dushman

na imtihāñ thā kisī kā na āzmānā thā

chal uḌ ke aur parinde kahīñ baserā kar

vo peḌ kaT ga.e jin par tirā Thikānā thā

na hausla tujhe detā kabhī dil-e-nāzuk

agar mujhe kisī manzil pe TuuT jaanā thā

badal ga.ī hai kuchh is tarah sūrat-e-gulshan

patā nahīñ hai kahāñ merā āshiyānā thā

ayaañ kiyā na kabhī ḳhud ko ġham-parastoñ ne

har ik maqām pe tauqīr-e-ġham baḌhānā thā

hameñ to rakhnī thī 'iqbāl' aabrū ġham key

ba-qaid-e-zabt bujhe dil se muskurānā thā

haqiqaton ka na parda abhi uThana tha

KHayal-o-KHwab ka manzar baDa suhana tha

talab key rah mein thi aarzu-e-dil dushman

na imtihan tha kisi ka na aazmana tha

chal uD ke aur parinde kahin basera kar

wo peD kaT gae jin par tera Thikana tha

na hausla tujhe deta kabhi dil-e-nazuk

agar mujhe kisi manzil pe TuT jaana tha

badal gai hai kuchh is tarah surat-e-gulshan

pata nahin hai kahan mera aashiyana tha

ayan kiya na kabhi KHud ko gham-paraston ne

har ek maqam pe tauqir-e-gham baDhana tha

hamein to rakhni thi 'iqbaal' aabru gham key

ba-qaid-e-zabt bujhe dil se muskurana tha