haqiqaton ka pata de ke KHud sarab hua

haqīqatoñ kā pata de ke ḳhud sarāb huā

vo mujh ko hosh meñ lā kar ḳhayāl-o-ḳhvāb huā

vo apne lams se patthar banā gayā mujh ko

visāl us kā mujhe sūrat-e-azāb huā

saroñ pe sab ke paḌī hādsoñ kī dhuup magar

koī sarāb banā aur koī sahāb huā

azaab sab ke mire jism-o-jāñ pe naqsh hue

mirā vajūd mire ahd kī kitāb huā

sukūt-e-shahr-e-sitam se asīr-e-yās na ho

ki yaañ sakūñ se huā jo bhī inqalāb huā

vahī to ek hamārā mizāj-dāñ thā 'razī'

jo ham se duur rahā aur na dastiyāb huā

haqiqaton ka pata de ke KHud sarab hua

wo mujh ko hosh mein la kar KHayal-o-KHwab hua

wo apne lams se patthar bana gaya mujh ko

visal us ka mujhe surat-e-azab hua

saron pe sab ke paDi hadson ki dhup magar

koi sarab bana aur koi sahab hua

azab sab ke mere jism-o-jaan pe naqsh hue

mera wajud mere ahd ki kitab hua

sukut-e-shahr-e-sitam se asir-e-yas na ho

ki yan sakun se hua jo bhi inqalab hua

wahi to ek hamara mizaj-dan tha 'razi'

jo hum se dur raha aur na dastiyab hua