haqiqaton se hai duniya ko ehtiraaz bahut

haqīqatoñ se hai duniyā ko ehtirāz bahut

ki hai mizāj-e-zamāna fasāna-sāz bahut

tirā ġhurūr-e-ibādat tujhe na le Duube

sunā hai paḌhtā thā iblīs bhī namāz bahut

koī bhī fitrat-e-yazdāñ kā rakh sakā na bharam

jo nā-sazā the vo kahlā.e pāk-bāz bahut

ye kah rahe the kal āvārgān-e-kūcha-e-yār

adā.eñ aaj bhī us kī haiñ dil-navāz bahut

unheñ shu.ūr-e-mohabbat nahīñ ḳhudā kī qasam

jo log haiñ tirī mahfil meñ sarfarāz bahut

mirī ḳhushī kā zamāna havā kā jhoñkā thā

mire ġhamoñ kī rahī zindagī darāz bahut

ye husn-o-ishq kā jauhar hai aur kuchh bhī nahīñ

vo ḳhud-pasand bahut haiñ maiñ be-niyāz bahut

haqiqaton se hai duniya ko ehtiraaz bahut

ki hai mizaj-e-zamana fasana-saz bahut

tera ghurur-e-ibaadat tujhe na le Dube

suna hai paDhta tha iblis bhi namaz bahut

koi bhi fitrat-e-yazdan ka rakh saka na bharam

jo na-saza the wo kahlae pak-baz bahut

ye kah rahe the kal aawargan-e-kucha-e-yar

adaen aaj bhi us ki hain dil-nawaz bahut

unhen shuur-e-mohabbat nahin KHuda ki qasam

jo log hain teri mahfil mein sarfaraaz bahut

meri KHushi ka zamana hawa ka jhonka tha

mere ghamon ki rahi zindagi daraaz bahut

ye husn-o-ishq ka jauhar hai aur kuchh bhi nahin

wo KHud-pasand bahut hain main be-niyaz bahut