haqir basti ke hum makinon mein rasm kaisi riwaj kaisa

haqīr bastī ke ham makīnoñ meñ rasm kaisī rivāj kaisā

jahāñ ho faaqe se jaañ laboñ par ġharīb beTī kā daaj kaisā

kahīñ pe DhūñDe se mil sake to zarūr dekho hameñ dikhāo

ġharīb mulkoñ kī kachchī bastī meñ chhāj kaisā anaaj kaisā

koī pukāre to log dekheñ zamīñ se niklo falak se utro

vagarna itnā batā do shāhū ye taḳht kaisā ye taaj kaisā

ḳhulūs-o-mehr-o-vafā nahīñ hai to rishte-nāte fuzūl saare

na kaam aa.e koī ta'alluq to dukh bharā ye samāj kaisā

ḳhudā kī bastī ḳhudā ke bande sabhī usī kī amānateñ haiñ

ḳhudā-e-vāhid ke pyāre bando ḳhudā ke bandoñ pe raaj kaisā

chalo umīdoñ kā haath thāme sabhī gharoñ se nikal ke dekheñ

ufuq se kirnoñ kā taaj pahne nikaltā sūraj hai aaj kaisā

haqir basti ke hum makinon mein rasm kaisi riwaj kaisa

jahan ho faqe se jaan labon par gharib beTi ka daj kaisa

kahin pe DhunDe se mil sake to zarur dekho hamein dikhao

gharib mulkon ki kachchi basti mein chhaj kaisa anaj kaisa

koi pukare to log dekhen zamin se niklo falak se utro

wagarna itna bata do shahu ye taKHt kaisa ye taj kaisa

KHulus-o-mehr-o-wafa nahin hai to rishte-nate fuzul sare

na kaam aae koi ta'alluq to dukh bhara ye samaj kaisa

KHuda ki basti KHuda ke bande sabhi usi ki amanaten hain

KHuda-e-wahid ke pyare bando KHuda ke bandon pe raj kaisa

chalo umidon ka hath thame sabhi gharon se nikal ke dekhen

ufuq se kirnon ka taj pahne nikalta suraj hai aaj kaisa