haqir jaanta hai iftiKhaar mangta hai

haqīr jāntā hai iftiḳhār māñgtā hai

vo zahr bāñTtā hai aur pyaar māñgtā hai

abhī to haath meñ us ke hai ḳhāndān kī laaj

garebāñ sab ke jo ab tār-tār māñgtā hai

bichhā ke rakhtā hai vo sab kī raah meñ kāñTe

sile meñ logoñ se phūloñ ke haar māñgtā hai

maiñ apne va.ade pe qarzā chukā nahīñ paayā

muāfī dil se abhī sharmsār māñgtā hai

havās jab se mile tab se iztirāb meñ huuñ

mire ḳhudā mirā dil bhī qarār māñgtā hai

amīr-e-shahr ne chhīnā hai muñh kā luqma bhī

phir is pe qahr abhī e.atibār māñgtā hai

abhī ye ahl-e-siyāsat ke bas kā rog nahīñ

abhī ye mulk nayā shahsavār māñgtā hai

bajā ke tā.ir-e-chashm-e-hasīn hai mashshāq

dil-o-nazar kā magar ye shikār māñgtā hai

maiñ dekhtā huuñ ki zulfeñ tirī sañvārtā huuñ

hai ḳhvāb achchhā magar intizār māñgtā hai

'rashīd' un pe mirā naġhma kārgar hī nahīñ

ye giit vo hai ki jo dil ke taar māñgtā hai

haqir jaanta hai iftiKHar mangta hai

wo zahr banTta hai aur pyar mangta hai

abhi to hath mein us ke hai KHandan ki laj

gareban sab ke jo ab tar-tar mangta hai

bichha ke rakhta hai wo sab ki rah mein kanTe

sile mein logon se phulon ke haar mangta hai

main apne wade pe qarza chuka nahin paya

muafi dil se abhi sharmsar mangta hai

hawas jab se mile tab se iztirab mein hun

mere KHuda mera dil bhi qarar mangta hai

amir-e-shahr ne chhina hai munh ka luqma bhi

phir is pe qahr abhi eatibar mangta hai

abhi ye ahl-e-siyasat ke bas ka rog nahin

abhi ye mulk naya shahsawar mangta hai

baja ke tair-e-chashm-e-hasin hai mashshaq

dil-o-nazar ka magar ye shikar mangta hai

main dekhta hun ki zulfen teri sanwarta hun

hai KHwab achchha magar intizar mangta hai

'rashid' un pe mera naghma kargar hi nahin

ye git wo hai ki jo dil ke tar mangta hai