haqir KHak ke zarre the aasman hue

haqīr ḳhaak ke zarre the āsmān hue

vo log jo dar-e-jānāñ ke pāsbān hue

shuda-shuda vahī gulshan ke hukmarān hue

jo ḳhaar pī ke guloñ kā lahū javān hue

ham aise ahl-e-junūñ par hañse na kyuuñ duniyā

ki sar kaTā ke samajhte haiñ kāmrān hue

ye kam nahīñ ki bujhā.ī hai pyaas kāñToñ kī

balā se rāh-e-vafā meñ lahūluhān hue

guloñ ne ābla-pā.ī kī koī daad na dī

chaman meñ ḳhaar hī chhāloñ ke mezbān hue

kiyā jo bhuul ke dil ne ḳhayāl-e-tark-e-vafā

ham apne aap se kyā kyā na bad-gumān hue

haqir KHak ke zarre the aasman hue

wo log jo dar-e-jaanan ke pasban hue

shuda-shuda wahi gulshan ke hukmaran hue

jo KHar pi ke gulon ka lahu jawan hue

hum aise ahl-e-junun par hanse na kyun duniya

ki sar kaTa ke samajhte hain kaamran hue

ye kam nahin ki bujhai hai pyas kanTon ki

bala se rah-e-wafa mein lahuluhan hue

gulon ne aabla-pai ki koi dad na di

chaman mein KHar hi chhaalon ke mezban hue

kiya jo bhul ke dil ne KHayal-e-tark-e-wafa

hum apne aap se kya kya na bad-guman hue