har aah be-asar hi nahin ba-asar bhi hai

har aah be-asar hī nahīñ bā-asar bhī hai

muddat se jo idhar thā vo aalam udhar bhī hai

gulshan ke pāsbāñ tujhe itnī ḳhabar bhī hai

tere chaman pe aur kisī kī nazar bhī hai

maanā ki har ravish hai bahāroñ se ham-kanār

lekin chaman meñ aaj koī dīda-var bhī hai

tanhā sahī maiñ rāh-e-junūñ meñ ravāñ-davāñ

mahsūs ho rahā hai koī ham-safar bhī hai

jab se huī haiñ tire karam kī navāzisheñ

dil pāsh-pāsh hī nahīñ zaḳhmī jigar bhī hai

kahne se pahle itnā to lāzim hai sochnā

jo baat muñh se niklegī vo be-zarar bhī hai

'zaidī' tū ho to jaatā hai har ḳhush-navā ke saath

kuchh imtiyāz-e-rāhzan-o-rāhbar bhī hai

har aah be-asar hi nahin ba-asar bhi hai

muddat se jo idhar tha wo aalam udhar bhi hai

gulshan ke pasban tujhe itni KHabar bhi hai

tere chaman pe aur kisi ki nazar bhi hai

mana ki har rawish hai bahaaron se ham-kanar

lekin chaman mein aaj koi dida-war bhi hai

tanha sahi main rah-e-junun mein rawan-dawan

mahsus ho raha hai koi ham-safar bhi hai

jab se hui hain tere karam ki nawazishen

dil pash-pash hi nahin zaKHmi jigar bhi hai

kahne se pahle itna to lazim hai sochna

jo baat munh se niklegi wo be-zarar bhi hai

'zaidi' tu ho to jata hai har KHush-nawa ke sath

kuchh imtiyaz-e-rahzan-o-rahbar bhi hai