har aaine ne kaha ruKHsat-e-ghubar ke baad

har aa.ine ne kahā ruḳhsat-e-ġhubār ke ba.ad

yahāñ to kuchh bhī nahīñ hai jamāl-e-yār ke ba.ad

zamāna zer-e-nagīñ thā razā-e-yār ke ba.ad

vo iḳhtiyār milā tark-e-iḳhtiyār ke ba.ad

ye māntā huuñ adab shart-e-ishq hai lekin

ye hosh kis ko rahegā nigāh-e-yār ke ba.ad

paroñ se muñh ko chhupā kar qafas meñ aa baiThā

chaman kā haal na dekhā gayā bahār ke ba.ad

vo jaam jaam nahīñ hāsil-e-do-ālam hai

jo dast-e-shauq meñ aayā hai intizār ke ba.ad

ġham-e-firāq kī manzil 'ra.īs' ḳhatm huī

ab aage jalve hī jalve haiñ hijr-e-yār ke ba.ad

har aaine ne kaha ruKHsat-e-ghubar ke baad

yahan to kuchh bhi nahin hai jamal-e-yar ke baad

zamana zer-e-nagin tha raza-e-yar ke baad

wo iKHtiyar mila tark-e-iKHtiyar ke baad

ye manta hun adab shart-e-ishq hai lekin

ye hosh kis ko rahega nigah-e-yar ke baad

paron se munh ko chhupa kar qafas mein aa baiTha

chaman ka haal na dekha gaya bahaar ke baad

wo jam jam nahin hasil-e-do-alam hai

jo dast-e-shauq mein aaya hai intizar ke baad

gham-e-firaq ki manzil 'rais' KHatm hui

ab aage jalwe hi jalwe hain hijr-e-yar ke baad