har aan us sitam-ijad ki ada hai aur

har aan us sitam-ījād kī adā hai aur

ki din ko aur hai shab ko vo dilrubā hai aur

abas ye ḳhuld kī tarġhīb mujh ko hai vaa.iz

ḳhudā-parastī se apnā to mudda.ā hai aur

mile jo huur kā bosa to maiñ na luuñ vaa.iz

ki chūmne meñ kisī ke qadam mazā hai aur

ye dam-ba-dam hai fuzūñ shauq-e-tālib-e-dīdār

javāb-e-sāf pe bhī arz-e-iltijā hai aur

ye himmat-e-dil-e-āshiq hai daad ke qābil

tumhāre jaur pe bhī mā.il-e-vafā hai aur

pilā diye mujhe saaqī ne ḳhum pe ḳhum 'sābir'

magar vo tishna-dahan huuñ mirī sadā hai aur

har aan us sitam-ijad ki ada hai aur

ki din ko aur hai shab ko wo dilruba hai aur

abas ye KHuld ki targhib mujh ko hai waiz

KHuda-parasti se apna to muddaa hai aur

mile jo hur ka bosa to main na lun waiz

ki chumne mein kisi ke qadam maza hai aur

ye dam-ba-dam hai fuzun shauq-e-talib-e-didar

jawab-e-saf pe bhi arz-e-iltija hai aur

ye himmat-e-dil-e-ashiq hai dad ke qabil

tumhaare jaur pe bhi mail-e-wafa hai aur

pila diye mujhe saqi ne KHum pe KHum 'sabir'

magar wo tishna-dahan hun meri sada hai aur