har aawaz zamistani hai har jazba zindani hai

har āvāz zamistānī hai har jazba zindānī hai

kūcha-e-yār se dār-o-rasan tak ek sī hī vīrānī hai

kitne koh-e-girāñ kaaTe tab sub.h-e-tarab kī diid huī

aur ye sub.h-e-tarab bhī yaaro kahte haiñ begānī hai

jitne aag ke dariyā meñ sab paar hamīñ ko karnā haiñ

duniyā kis ke saath aa.ī hai duniyā to dīvānī hai

lamha lamha ḳhvāb dikhā.e aur sau sau ta.abīr kare

lazzat-e-kam-āzār bahut hai jis kā naam javānī hai

dil kahtā hai vo kuchh bhī ho us kī yaad jagā.e rakh

aql ye kahtī hai ki tavahhum par jiinā nādānī hai

tere pyaar se pahle kab thā dil meñ aisā soz-o-gudāz

tujh se pyaar kiyā to ham ne apnī qīmat jaanī hai

aap bhī kaise shahar meñ aa kar shā.ir kahlā.e haiñ 'alīm'

dard jahāñ kamyāb bahut hai naġhmoñ kī arzānī hai

har aawaz zamistani hai har jazba zindani hai

kucha-e-yar se dar-o-rasan tak ek si hi virani hai

kitne koh-e-giran kaTe tab subh-e-tarab ki did hui

aur ye subh-e-tarab bhi yaro kahte hain begani hai

jitne aag ke dariya mein sab par hamin ko karna hain

duniya kis ke sath aai hai duniya to diwani hai

lamha lamha KHwab dikhae aur sau sau tabir kare

lazzat-e-kam-azar bahut hai jis ka nam jawani hai

dil kahta hai wo kuchh bhi ho us ki yaad jagae rakh

aql ye kahti hai ki tawahhum par jina nadani hai

tere pyar se pahle kab tha dil mein aisa soz-o-gudaz

tujh se pyar kiya to hum ne apni qimat jaani hai

aap bhi kaise shahar mein aa kar shair kahlae hain 'alim'

dard jahan kamyab bahut hai naghmon ki arzani hai