har aqida har yaqin wahm-o-guman banta gaya

har aqīda har yaqīñ vahm-o-gumāñ bantā gayā

har zamīñ par dūsrā ik āsmāñ bantā gayā

qaid-e-hastī se chhuTā to be-karāñ bantā gayā

ḳhaak ho kar phuul shabnam kahkashāñ bantā gayā

kab havādis past kar paa.e kisī ke hausle

barq kī bāñhoñ meñ apnā āshiyāñ bantā gayā

ik adā achchhī lagī phir har adā qātil banī

gul se vo mere liye ik gulsitāñ bantā gayā

ḳhuun se mazdūr ke chamke nuqūsh-e-zindagī

ḳhud fanā hotā rahā kār-e-jahāñ bantā gayā

kitne kāñTe rahguzar ke ab bhī pyāse rah ga.e

qurb-e-manzil mujh ko ehsās-e-ziyāñ bantā gayā

terā ai teġh-e-sitam ham par burā ehsān hai

ik hujūm-e-muntashir se kārvāñ bantā gayā

de na paayā zindagī ko maiñ kabhī ḳhūn-e-jigar

kuchh magar aisā thā mujh meñ jāvedāñ bantā gayā

rang-o-bū ke sail meñ thā ek andāz-e-junūñ

phuul murjhāte rahe aur gulsitāñ bantā gayā

muntahā-e-fikr-e-insānī bane dair-o-haram

har ġhubār-e-rāh manzil kā nishāñ bantā gayā

jis ko dekhā mubtalā-e-ġham thā mujh se bhī sivā

phir to apne daur kā maiñ nauha-ḳhvāñ bantā gayā

bijliyāñ girtī rahīñ mahmez ban kar shauq kī

āshiyāñ jaltā rahā aur āshiyāñ bantā gayā

har aqida har yaqin wahm-o-guman banta gaya

har zamin par dusra ek aasman banta gaya

qaid-e-hasti se chhuTa to be-karan banta gaya

KHak ho kar phul shabnam kahkashan banta gaya

kab hawadis past kar pae kisi ke hausle

barq ki banhon mein apna aashiyan banta gaya

ek ada achchhi lagi phir har ada qatil bani

gul se wo mere liye ek gulsitan banta gaya

KHun se mazdur ke chamke nuqush-e-zindagi

KHud fana hota raha kar-e-jahan banta gaya

kitne kanTe rahguzar ke ab bhi pyase rah gae

qurb-e-manzil mujh ko ehsas-e-ziyan banta gaya

tera ai tegh-e-sitam hum par bura ehsan hai

ek hujum-e-muntashir se karwan banta gaya

de na paya zindagi ko main kabhi KHun-e-jigar

kuchh magar aisa tha mujh mein jawedan banta gaya

rang-o-bu ke sail mein tha ek andaz-e-junun

phul murjhate rahe aur gulsitan banta gaya

muntaha-e-fikr-e-insani bane dair-o-haram

har ghubar-e-rah manzil ka nishan banta gaya

jis ko dekha mubtala-e-gham tha mujh se bhi siwa

phir to apne daur ka main nauha-KHwan banta gaya

bijliyan girti rahin mahmez ban kar shauq ki

aashiyan jalta raha aur aashiyan banta gaya