har baat kaTte hain wo talwar ki tarah

har baat kāTte haiñ vo talvār kī tarah

ahbāb kā sulūk hai aġhyār kī tarah

duniyā meñ jin ko zuhd pe apne ġhurūr thā

mahshar meñ vo khaḌe haiñ ḳhatā-kār kī tarah

nazroñ kā rang aur ishāroñ kī baat aur

inkār kar rahe haiñ vo iqrār kī tarah

tūl-e-maraz ne un ko kasal-mand kar diyā

tīmār-dār baiThe haiñ bīmār kī tarah

hāsil kanār-e-dost ho aisā kahāñ nasīb

sāhil se duur duur haiñ mañjdhār kī tarah

har zāviye se un kī javānī ke vāqi'āt

tartīb de rahā huuñ maiñ fankār kī tarah

tere huzūr aa ke zamāne ke shaah bhī

muñh dekhte haiñ banda-e-nādār kī tarah

taḳhrīb-kāriyoñ se hameñ kuchh ġharaz nahīñ

jiinā hai 'charḳh' ham ko to me'mār kī tarah

har baat kaTte hain wo talwar ki tarah

ahbab ka suluk hai aghyar ki tarah

duniya mein jin ko zuhd pe apne ghurur tha

mahshar mein wo khaDe hain KHata-kar ki tarah

nazron ka rang aur ishaaron ki baat aur

inkar kar rahe hain wo iqrar ki tarah

tul-e-maraz ne un ko kasal-mand kar diya

timar-dar baiThe hain bimar ki tarah

hasil kanar-e-dost ho aisa kahan nasib

sahil se dur dur hain manjdhaar ki tarah

har zawiye se un ki jawani ke waqi'at

tartib de raha hun main fankar ki tarah

tere huzur aa ke zamane ke shah bhi

munh dekhte hain banda-e-nadar ki tarah

taKHrib-kariyon se hamein kuchh gharaz nahin

jina hai 'charKH' hum ko to me'mar ki tarah