har baat teri jaan-e-jahan man raha hun

har baat tirī jān-e-jahāñ maan rahā huuñ

ab ḳhāk-e-rah-e-kāhkashāñ chhān rahā huuñ

asnām se derīna ta.alluq kī badaulat

maiñ kufr kā har daur meñ īmān rahā huuñ

duniyā se laḌā.ī to azal hī se rahī hai

ab ḳhud se jhagaḌne kī bhī maiñ Thaan rahā huuñ

ab tak to shab-o-roz kuchh is tarah kaTe haiñ

jis jā bhī rahā apnā hī mehmān rahā huuñ

mansab ye mujhe jabr-e-mashiyat se milā hai

chaltī huī lāshoñ kā nigahbān rahā huuñ

vo sher huuñ jis ko abhī sochegā zamāna

likkhā na gayā jis ko vo dīvān rahā huuñ

be-tāj huuñ be-taḳht huuñ be-mulk-o-hukumat

haañ naam kā lekin maiñ 'sulaimān' rahā huuñ

har baat teri jaan-e-jahan man raha hun

ab KHak-e-rah-e-kahkashan chhan raha hun

asnam se derina talluq ki badaulat

main kufr ka har daur mein iman raha hun

duniya se laDai to azal hi se rahi hai

ab KHud se jhagaDne ki bhi main Than raha hun

ab tak to shab-o-roz kuchh is tarah kaTe hain

jis ja bhi raha apna hi mehman raha hun

mansab ye mujhe jabr-e-mashiyat se mila hai

chalti hui lashon ka nigahban raha hun

wo sher hun jis ko abhi sochega zamana

likkha na gaya jis ko wo diwan raha hun

be-taj hun be-taKHt hun be-mulk-o-hukumat

han nam ka lekin main 'sulaiman' raha hun