har bashar ka maqam likkha hai

har bashar kā maqām likkhā hai

sab kā bā-zarf kaam likkhā hai

mere likkhe pe haq kisī kā nahīñ

jo likhā tere naam likkhā hai

ham se likhvā rahā hai kis kā junūñ

kaun hai kis kā kaam likkhā hai

chiir kar dekh le mirā siina

is meñ terā hī naam likkhā hai

soch kar jab kabhī likhā maiñ ne

jo bhī likkhā hai ḳhaam likkhā hai

likhne vāloñ kā kyā kahūñ hamdam

sub.h likkhā hai shaam likkhā hai

ḳhaas likhte haiñ likhne vaale sab

jo likhā ham ne aam likkhā hai

pāniyoñ aur havā pe likh na sake

ham ne dhartī pe naam likkhā hai

jis ko jāgīr apnī vo samjhe

us pe merā bhī naam likkhā hai

zahr hī zahr apne hisse meñ

un kī qismat meñ jaam likkhā hai

us kī rahmat kā kyā gila 'hairat'

dard-o-ġham mere naam likkhā hai

har bashar ka maqam likkha hai

sab ka ba-zarf kaam likkha hai

mere likkhe pe haq kisi ka nahin

jo likha tere nam likkha hai

hum se likhwa raha hai kis ka junun

kaun hai kis ka kaam likkha hai

chir kar dekh le mera sina

is mein tera hi nam likkha hai

soch kar jab kabhi likha main ne

jo bhi likkha hai KHam likkha hai

likhne walon ka kya kahun hamdam

subh likkha hai sham likkha hai

KHas likhte hain likhne wale sab

jo likha hum ne aam likkha hai

paniyon aur hawa pe likh na sake

hum ne dharti pe nam likkha hai

jis ko jagir apni wo samjhe

us pe mera bhi nam likkha hai

zahr hi zahr apne hisse mein

un ki qismat mein jam likkha hai

us ki rahmat ka kya gila 'hairat'

dard-o-gham mere nam likkha hai