har bulandi se guzar jaana tha

har bulandī se guzar jaanā thā

kaam mushkil sahī kar jaanā thā

mauj-dar-mauj sañvarne ke liye

ġham ke dariyā meñ utar jaanā thā

kab talak kashmakash-e-maut-o-hayāt

yā to jiinā thā yā mar jaanā thā

ishq pāband-e-gulistāñ kyoñ ho

bū-e-gul ban ke bikhar jaanā thā

kaun se moḌ pe aa pahuñchā huuñ

bhuul baiThā huuñ kidhar jaanā thā

paañv be-jān the āñkheñ be-nūr

duur manzil thī magar jaanā thā

vo bhī nazroñ se girā hai 'jauhar'

jis ko me.arāj-e-nazar jaanā thā

har bulandi se guzar jaana tha

kaam mushkil sahi kar jaana tha

mauj-dar-mauj sanwarne ke liye

gham ke dariya mein utar jaana tha

kab talak kashmakash-e-maut-o-hayat

ya to jina tha ya mar jaana tha

ishq paband-e-gulistan kyon ho

bu-e-gul ban ke bikhar jaana tha

kaun se moD pe aa pahuncha hun

bhul baiTha hun kidhar jaana tha

panw be-jaan the aankhen be-nur

dur manzil thi magar jaana tha

wo bhi nazron se gira hai 'jauhar'

jis ko mearaj-e-nazar jaana tha