har-chand ki baat apni kab lutf se Khaali hai

har-chand ki baat apnī kab lutf se ḳhālī hai

par yaar na samjheñ to ye baat nirālī hai

āġhosh meñ hai vo aur pahlū mirā ḳhālī hai

māshūq mirā goyā tasvīr-e-ḳhyālī hai

kyā Dar hai agar us ne dar se mujhe uThvāyā

kahte haiñ taġhayyurī meñ āshiq kī bahālī hai

bālīñ pe jab aayā hai bīmār kī tū apne

tab ruuh ke qābiz ne jaan us kī nikālī hai

maiñ haal bayāñ apnā kartā huuñ ġhazal kah ke

is vāste ab merā jo sher hai haalī hai

mehñdī ke lagāne meñ phurtī ye nahīñ dekhī

zālim ne hathelī par sarsoñ sī jamā lī hai

har-chand ki parvāna jal jaane meñ hai āñdhī

par sham.a bhī ātish meñ jī jhoñkne vaalī hai

maanī ne shabīh us kī kyā soch ke khīñchī thī

mū-e-kamar us ke kī tasvīr ḳhayālī hai

zāhir hai ki jaage ho tum raat kahīñ rah kar

āñkhoñ meñ nashe kī to kuchh thoḌī sī laalī hai

maqdūr magar kab thā qurbān haiñ ham us ke

dāman kī tire jis ne ye jhoñk sambhālī hai

ai 'mus.hafī' hai terā itnā jo suḳhan chaspāñ

kyā tū ne javāñ darzan ghar meñ koī Daalī hai

har-chand ki baat apni kab lutf se KHali hai

par yar na samjhen to ye baat nirali hai

aaghosh mein hai wo aur pahlu mera KHali hai

mashuq mera goya taswir-e-KHyali hai

kya Dar hai agar us ne dar se mujhe uThwaya

kahte hain taghayyuri mein aashiq ki bahaali hai

baalin pe jab aaya hai bimar ki tu apne

tab ruh ke qabiz ne jaan us ki nikali hai

main haal bayan apna karta hun ghazal kah ke

is waste ab mera jo sher hai haali hai

mehndi ke lagane mein phurti ye nahin dekhi

zalim ne hatheli par sarson si jama li hai

har-chand ki parwana jal jaane mein hai aandhi

par shama bhi aatish mein ji jhonkne wali hai

mani ne shabih us ki kya soch ke khinchi thi

mu-e-kamar us ke ki taswir KHayali hai

zahir hai ki jage ho tum raat kahin rah kar

aankhon mein nashe ki to kuchh thoDi si lali hai

maqdur magar kab tha qurban hain hum us ke

daman ki tere jis ne ye jhonk sambhaali hai

ai 'mushafi' hai tera itna jo suKHan chaspan

kya tu ne jawan darzan ghar mein koi Dali hai