har chand ki hum murid-e-pur-qahr-o-ghazab hain

har chand ki ham mūrid-e-pur-qahr-o-ġhazab haiñ

bātil ke parastār na pahle the na ab haiñ

vo log kahāñ ab jinheñ kahte the mujāhid

is daur-e-taraqqī meñ sab ārām-talab haiñ

fursat jo mile ġham se to mismār hī kar duuñ

jitne bhī sar-e-rāh ye aivān-e-tarab haiñ

kyā jāniye kis nashsha-e-ġhaflat meñ haiñ sarshār

mad.hosh nahīñ ham magar hushyār bhī kab haiñ

rahbar haiñ ki rahzan haiñ samajh meñ nahīñ aatā

hamdard nahīñ ek bhī hamrāh to sab haiñ

īmā-e-nazar ho to dil-o-jāñ bhī tasadduq

ham vo nahīñ jo muntazir-e-jumbish-e-lab haiñ

dil Dūbne lagtā hai tasavvur se bhī jin ke

aise bhī maqāmāt sar-e-rāh-e-talab haiñ

dil chiir ga.ī jin kī fuġhān-e-shab-e-tārīk

ab rang-e-sahar dekh ke kyoñ muhr-ba-lab haiñ

'rāhī' se mile jab bhī ye mahsūs kiyā hai

us shaḳhs ke jazbāt-o-ḳhayālāt ajab haiñ

har chand ki hum murid-e-pur-qahr-o-ghazab hain

baatil ke parastar na pahle the na ab hain

wo log kahan ab jinhen kahte the mujahid

is daur-e-taraqqi mein sab aaram-talab hain

fursat jo mile gham se to mismar hi kar dun

jitne bhi sar-e-rah ye aiwan-e-tarab hain

kya jaaniye kis nashsha-e-ghaflat mein hain sarshaar

madhosh nahin hum magar hushyar bhi kab hain

rahbar hain ki rahzan hain samajh mein nahin aata

hamdard nahin ek bhi hamrah to sab hain

ima-e-nazar ho to dil-o-jaan bhi tasadduq

hum wo nahin jo muntazir-e-jumbish-e-lab hain

dil Dubne lagta hai tasawwur se bhi jin ke

aise bhi maqamat sar-e-rah-e-talab hain

dil chir gai jin ki fughan-e-shab-e-tarik

ab rang-e-sahar dekh ke kyon muhr-ba-lab hain

'rahi' se mile jab bhi ye mahsus kiya hai

us shaKHs ke jazbaat-o-KHayalat ajab hain