har-chand ki saghar ki tarah josh mein rahiye

har-chand ki sāġhar kī tarah josh meñ rahiye

saaqī se mile aañkh to phir hosh meñ rahiye

kuchh us ke tasavvur meñ vo rāhat hai ki barsoñ

baiThe yūñhī is vādī-e-gul-posh meñ rahiye

ik saada tabassum meñ vo jaadū hai ki pahroñ

Duube hue ik naġhma-e-ḳhāmosh meñ rahiye

hotī hai yahāñ qadr kise dīda-varī kī

āñkhoñ kī tarah apne hī āġhosh meñ rahiye

Thahrā.ī hai ab hāl-e-ġham-e-dil ne ye sūrat

mastī kī tarah dīda-e-mai-nosh meñ rahiye

himmat ne chalan ab ye nikālā hai ki chubh kar

kāñTe kī tarah pā-e-talab-kosh meñ rahiye

āsūda-dilī raas nahīñ arz-e-suḳhan ko

hai shart ki dariyā kī tarah josh meñ rahiye

har-chand ki saghar ki tarah josh mein rahiye

saqi se mile aankh to phir hosh mein rahiye

kuchh us ke tasawwur mein wo rahat hai ki barson

baiThe yunhi is wadi-e-gul-posh mein rahiye

ek sada tabassum mein wo jadu hai ki pahron

Dube hue ek naghma-e-KHamosh mein rahiye

hoti hai yahan qadr kise dida-wari ki

aankhon ki tarah apne hi aaghosh mein rahiye

Thahrai hai ab haal-e-gham-e-dil ne ye surat

masti ki tarah dida-e-mai-nosh mein rahiye

himmat ne chalan ab ye nikala hai ki chubh kar

kanTe ki tarah pa-e-talab-kosh mein rahiye

aasuda-dili ras nahin arz-e-suKHan ko

hai shart ki dariya ki tarah josh mein rahiye