har chehra na jaane kyun ghabraya hua sa hai

har chehra na jaane kyuuñ ghabrāyā huā sā hai

bechain sā lagtā hai taḌpāyā huā sā hai

kyā dhoka nayā koī khāyā hai mohabbat meñ

har uzv-e-badan us kā tharrāyā huā sā hai

āñkhoñ meñ chamak sī hai ruḳhsār meñ surḳhī sī

āġhosh meñ ulfat kī sharmāyā huā sā hai

khilne kī tamannā thī zulfoñ ke gulistāñ meñ

dil TuuT gayā gul kā murjhāyā huā sā hai

khulne meñ qabāhat hai gesū-e-mohabbat ko

chehra shab-e-hasrat kā pathrāyā huā sā hai

alfāz kī āñkhoñ se barsāt hai ashkoñ kī

lahja ġham-e-jānāñ se bharrāyā huā sā hai

nafrat kī shu'ā'oñ kī yalġhār hai har jaañ par

jis qalb meñ bhī jhāñko kumhlāyā huā sā hai

ilhād kā hamla hai 'jāved' har ik jānib

'ālam kā ye 'ālam hai paglāyā huā sā hai

har chehra na jaane kyun ghabraya hua sa hai

bechain sa lagta hai taDpaya hua sa hai

kya dhoka naya koi khaya hai mohabbat mein

har uzw-e-badan us ka tharraya hua sa hai

aankhon mein chamak si hai ruKHsar mein surKHi si

aaghosh mein ulfat ki sharmaya hua sa hai

khilne ki tamanna thi zulfon ke gulistan mein

dil TuT gaya gul ka murjhaya hua sa hai

khulne mein qabahat hai gesu-e-mohabbat ko

chehra shab-e-hasrat ka pathraya hua sa hai

alfaz ki aankhon se barsat hai ashkon ki

lahja gham-e-jaanan se bharraya hua sa hai

nafrat ki shu'a'on ki yalghaar hai har jaan par

jis qalb mein bhi jhanko kumhlaya hua sa hai

ilhad ka hamla hai 'jawed' har ek jaanib

'alam ka ye 'alam hai paglaya hua sa hai