har dar aur rasan mein jalwa usi ka dekha

har daar aur rasan meñ jalva usī kā dekhā

kākul kī har shikan meñ jalva usī kā dekhā

ka.aba ho yā kalīsā masjid ho yā ki mandir

har ek anjuman meñ jalva usī kā dekhā

har shāḳh aur shajar meñ har phuul aur kalī meñ

nasrīñ meñ nastaran meñ jalva usī kā dekhā

naġhmoñ meñ bulbuloñ ke kū-kū meñ qumriyoñ kī

har gul meñ gul-badan meñ jalva usī kā dekhā

husn-e-sanam ke andar pinhāñ usī ko paayā

but aur barhaman meñ jalva usī kā dekhā

har naaz har adā meñ shoḳhī meñ aur hayā meñ

us shoḳh ke dahan meñ jalva usī kā dekhā

ye sab usī sanam ke qudrat ke haiñ karishme

husn aur bāñkpan meñ jalva usī kā dekhā

aa.ī nazar lahad meñ ba.ad-e-fanā vo sūrat

muñh chhupte hī kafan meñ jalva usī kā dekhā

parvāne haiñ fidā.ī jis sham.a-rū ke 'sanjar'

har shaam anjuman meñ jalva usī kā dekhā

har dar aur rasan mein jalwa usi ka dekha

kakul ki har shikan mein jalwa usi ka dekha

kaba ho ya kalisa masjid ho ya ki mandir

har ek anjuman mein jalwa usi ka dekha

har shaKH aur shajar mein har phul aur kali mein

nasrin mein nastaran mein jalwa usi ka dekha

naghmon mein bulbulon ke ku-ku mein qumriyon ki

har gul mein gul-badan mein jalwa usi ka dekha

husn-e-sanam ke andar pinhan usi ko paya

but aur barhaman mein jalwa usi ka dekha

har naz har ada mein shoKHi mein aur haya mein

us shoKH ke dahan mein jalwa usi ka dekha

ye sab usi sanam ke qudrat ke hain karishme

husn aur bankpan mein jalwa usi ka dekha

aai nazar lahad mein baad-e-fana wo surat

munh chhupte hi kafan mein jalwa usi ka dekha

parwane hain fidai jis shama-ru ke 'sanjar'

har sham anjuman mein jalwa usi ka dekha