har dam batae jate hain hum bewafa nahin

har dam batā.e jaate haiñ ham bevafā nahīñ

tum ko nahīñ yaqīn to shak kī davā nahīñ

vo kah rahe haiñ naaz se ham bevafā nahīñ

kis kā hai muñh jo kah de ye da.avā bajā nahīñ

zulf-e-rasā bhī yaar kī itnī rasā nahīñ

tūl-e-shab-e-firāq kī kuchh intihā nahīñ

aane ko hai vo hosh-rubā ho ke be-naqāb

ai be-ḳhudī jabhī to patā hosh kā nahīñ

o rashk-e-hūr qatl na kar mujh ġharīb ko

kūcha tirā bahisht hai kuchh karbalā nahīñ

bijlī se bhī sivā hai chamak meñ nigāh-e-shoḳh

sach hai vo teġh hī nahīñ jis par jilā nahīñ

kal ḳhush the vo jo pūchhte the merī aarzū

kaisī ye mujh se chuuk huī kuchh kahā nahīñ

shākī huuñ apne baḳht kā samjho to baat bhī

tum kyoñ bigaḌ rahe ho tumhārā gila nahīñ

ro kar adū ke sog meñ andher kar diyā

ai shoḳh aaj aañkh tirī surma sā nahīñ

dil de ke maiñ huā hadaf-e-nāvak-e-sitam

is meñ mirī ḳhatā hai tumhārī ḳhatā nahīñ

ghabrāo mat jo māñgte haiñ ham duā-e-vasl

maqbūl ho kabhī vo hamārī duā nahīñ

pariyoñ meñ ye adā hai na hūroñ meñ ye banāo

ḳhud husn kah rahā hai ki saanī tirā nahīñ

insāf kī jo baat hai kahtā huuñ ai 'fahīm'

shā.ir nahīñ jo mo'taqid ehsān kā nahīñ

har dam batae jate hain hum bewafa nahin

tum ko nahin yaqin to shak ki dawa nahin

wo kah rahe hain naz se hum bewafa nahin

kis ka hai munh jo kah de ye dawa baja nahin

zulf-e-rasa bhi yar ki itni rasa nahin

tul-e-shab-e-firaq ki kuchh intiha nahin

aane ko hai wo hosh-ruba ho ke be-naqab

ai be-KHudi jabhi to pata hosh ka nahin

o rashk-e-hur qatl na kar mujh gharib ko

kucha tera bahisht hai kuchh karbala nahin

bijli se bhi siwa hai chamak mein nigah-e-shoKH

sach hai wo tegh hi nahin jis par jila nahin

kal KHush the wo jo puchhte the meri aarzu

kaisi ye mujh se chuk hui kuchh kaha nahin

shaki hun apne baKHt ka samjho to baat bhi

tum kyon bigaD rahe ho tumhaara gila nahin

ro kar adu ke sog mein andher kar diya

ai shoKH aaj aankh teri surma sa nahin

dil de ke main hua hadaf-e-nawak-e-sitam

is mein meri KHata hai tumhaari KHata nahin

ghabrao mat jo mangte hain hum dua-e-wasl

maqbul ho kabhi wo hamari dua nahin

pariyon mein ye ada hai na huron mein ye banao

KHud husn kah raha hai ki sani tera nahin

insaf ki jo baat hai kahta hun ai 'fahim'

shair nahin jo mo'taqid ehsan ka nahin