har dam nigah mein tera husn-o-jamal hai

har dam nigāh meñ tirā husn-o-jamāl hai

ḳhamyāza-e-bahār kā kis ko ḳhayāl hai

jo naqsh-e-ārzī the vo sab dil se miT ga.e

baaqī jo rah gayā hai vo terā ḳhayāl hai

nā-pā.edārioñ pe hai buniyād-e-zindagī

anjām har kamāl kā ik din zavāl hai

ai shaiḳh ham ko rahmat-e-yazdāñ pe hai yaqīñ

mahshar kī bāz-purs kā kis ko ḳhayāl hai

ham jānte haiñ zabt-e-fuġhāñ ḳhuub hai magar

zabt-e-fuġhāñ bahār meñ lekin muhāl hai

aa.e tire huzūr ye taufīq hai kise

dekhe terā jamāl ye kis kī majāl hai

jis ko zarā bhī chhū ga.ī sarshār kar ga.ī

saaqī tirī nigāh meñ ye kyā kamāl hai

ye kaun sā maqām hai ai be-ḳhudī batā

hai ḳhauf-e-hijr dil meñ na shauq-e-visāl hai

'sābir' yahāñ sabāt kisī chiiz ko nahīñ

bas ġham hī ek chiiz hai jo lā-zavāl hai

har dam nigah mein tera husn-o-jamal hai

KHamyaza-e-bahaar ka kis ko KHayal hai

jo naqsh-e-arzi the wo sab dil se miT gae

baqi jo rah gaya hai wo tera KHayal hai

na-paedarion pe hai buniyaad-e-zindagi

anjam har kamal ka ek din zawal hai

ai shaiKH hum ko rahmat-e-yazdan pe hai yaqin

mahshar ki baz-purs ka kis ko KHayal hai

hum jaante hain zabt-e-fughan KHub hai magar

zabt-e-fughan bahaar mein lekin muhaal hai

aae tere huzur ye taufiq hai kise

dekhe tera jamal ye kis ki majal hai

jis ko zara bhi chhu gai sarshaar kar gai

saqi teri nigah mein ye kya kamal hai

ye kaun sa maqam hai ai be-KHudi bata

hai KHauf-e-hijr dil mein na shauq-e-visal hai

'sabir' yahan sabaat kisi chiz ko nahin

bas gham hi ek chiz hai jo la-zawal hai