har dar pe apne sar ko jhukae hue hain log

har dar pe apne sar ko jhukā.e hue haiñ log

apnā vaqār ḳhud hī girā.e hue haiñ log

ā.īna ban ke shahr meñ aa.e hue haiñ log

ḳhanjar bhī āstīñ meñ chhupā.e hue haiñ log

pūchho na apne shahr kī tahzīb kā chalan

izzat kisī tarah se bachā.e hue haiñ log

ik jashn-e-inqalāb manāne ke vāste

maqtal har ek ghar ko banā.e hue haiñ log

dil meñ kudūrateñ haiñ magar dekhiye janāb

ik dūsre se haath milā.e hue haiñ log

aatā nahīñ zabāñ pe kabhī un ke us kā naam

kyā jaane dil meñ kis ko basā.e hue haiñ log

sahrā-navard koī nahīñ hai 'qamar-ra.īs’

vīrān shahr-e-gul ko banā.e hue haiñ log

har dar pe apne sar ko jhukae hue hain log

apna waqar KHud hi girae hue hain log

aaina ban ke shahr mein aae hue hain log

KHanjar bhi aastin mein chhupae hue hain log

puchho na apne shahr ki tahzib ka chalan

izzat kisi tarah se bachae hue hain log

ek jashn-e-inqalab manane ke waste

maqtal har ek ghar ko banae hue hain log

dil mein kuduraten hain magar dekhiye janab

ek dusre se hath milae hue hain log

aata nahin zaban pe kabhi un ke us ka nam

kya jaane dil mein kis ko basae hue hain log

sahra-naward koi nahin hai 'qamar-rais’

viran shahr-e-gul ko banae hue hain log