har dil se numayan hain aasar mohabbat ke

har dil se numāyāñ haiñ āsār mohabbat ke

mushtāq haiñ ā.īne lākhoñ tirī sūrat ke

mustaġhnī-e-duniyā haiñ muhtāj ināyat ke

hashmat ke nahīñ tālib ḳhvāhāñ nahīñ izzat ke

shamshīr-e-taġhāful se dil ke na karo TukḌe

khul jā.eñge duniyā par asrār mohabbat ke

dekhī na ga.ī ahl-e-isyāñ kī pareshānī

qurbān tarahhum ke sadqe tirī rahmat ke

ik qissa-e-pārīna hai qais kā afsāna

dhuñdle na hoñ kyoñ zarre sahrā-e-mohabbat ke

ālām-o-masā.ib haiñ monis shab-e-tanhā.ī

mamnūn hoñ ham kahiye kis kis kī ināyat ke

nairangī-e-ulfat ne Daalā hai kashākash meñ

jiite haiñ na marte haiñ bīmār mohabbat ke

yūsuf kī zuleḳhā par kyā ḳhaak nazar paḌtī

the dīda-e-bīnā meñ jalve tirī qudrat ke

iz.hār-e-taġhāful bhī ḳhvāhān-e-adab niklā

karnā thā gila ham ko parde meñ mohabbat ke

pahlū nazar aate haiñ ye turfa-tamāshā hai

iqrār-e-mohabbat meñ inkār-e-mohabbat ke

vo aa.e jo turbat par to hashr bapā hogā

ā.eñge nazar ham ko āsār qayāmat ke

'mas.ūd' hasīnoñ ko dil meñ na jagah denā

kuchh der nahīñ lagtī aane meñ tabī.at ke

har dil se numayan hain aasar mohabbat ke

mushtaq hain aaine lakhon teri surat ke

mustaghni-e-duniya hain muhtaj inayat ke

hashmat ke nahin talib KHwahan nahin izzat ke

shamshir-e-taghaful se dil ke na karo TukDe

khul jaenge duniya par asrar mohabbat ke

dekhi na gai ahl-e-isyan ki pareshani

qurban tarahhum ke sadqe teri rahmat ke

ek qissa-e-parina hai qais ka afsana

dhundle na hon kyon zarre sahra-e-mohabbat ke

aalam-o-masaib hain monis shab-e-tanhai

mamnun hon hum kahiye kis kis ki inayat ke

nairangi-e-ulfat ne Dala hai kashakash mein

jite hain na marte hain bimar mohabbat ke

yusuf ki zuleKHa par kya KHak nazar paDti

the dida-e-bina mein jalwe teri qudrat ke

izhaar-e-taghaful bhi KHwahan-e-adab nikla

karna tha gila hum ko parde mein mohabbat ke

pahlu nazar aate hain ye turfa-tamasha hai

iqrar-e-mohabbat mein inkar-e-mohabbat ke

wo aae jo turbat par to hashr bapa hoga

aaenge nazar hum ko aasar qayamat ke

'masud' hasinon ko dil mein na jagah dena

kuchh der nahin lagti aane mein tabiat ke