har din jis par phul khilen wo be-mausam ki Dal nahin main

har din jis par phuul khileñ vo be-mausam kī Daal nahīñ maiñ

saaje na saaje har kañdhe par paḌne vaalī shaal nahīñ maiñ

miTTī kā huuñ pyāla lekin pyaas meñ sab kā haath baTā.ūñ

joḌ leñ jis meñ aartī jhaT se pītal kī vo thaal nahīñ maiñ

ḳhuub ḳhizāñ ko is kā pata hai hāl-e-zabūñ bhī merā judā hai

dosh-e-havā par uḌne vaale pattoñ sā behāl nahīñ maiñ

merā muqaddar haath meñ mere vaqt se mere rishte naate

jhūTī tasallī dene vaalī koī kitāb-e-fāl nahīñ maiñ

bād-e-muḳhālif laakh chale par uḌ nahīñ paa.e rañgat merī

rañg-ba-rañg calender par chhapne vaalā saal nahīñ maiñ

fankāro kī sunnat huuñ 'afsar' jo hai dil meñ vo hai muñh par

phāñsne vaalī chaal hai jis meñ makḌī kā vo jaal nahīñ maiñ

har din jis par phul khilen wo be-mausam ki Dal nahin main

saje na saje har kandhe par paDne wali shaal nahin main

miTTi ka hun pyala lekin pyas mein sab ka hath baTaun

joD len jis mein aarti jhaT se pital ki wo thaal nahin main

KHub KHizan ko is ka pata hai haal-e-zabun bhi mera juda hai

dosh-e-hawa par uDne wale patton sa behaal nahin main

mera muqaddar hath mein mere waqt se mere rishte nate

jhuTi tasalli dene wali koi kitab-e-fal nahin main

baad-e-muKHalif lakh chale par uD nahin pae rangat meri

rang-ba-rang calender par chhapne wala sal nahin main

fankaro ki sunnat hun 'afsar' jo hai dil mein wo hai munh par

phansne wali chaal hai jis mein makDi ka wo jal nahin main