har ek abr ke TukDe ko baal-o-par dega

har ek abr ke TukḌe ko bāl-o-par degā

shajar shajar ko ye mausam nayā samar degā

vo merī qabr pe ik musht-e-ḳhāk de aaya

jise thā da.avā ke māñgūñ to bahr-o-bar degā

nihāl-e-dard ko ashkoñ se sīñchte rahnā

ġhamoñ kī dhuup meñ saaya yahī shajar degā

pata shu.ūr kī tah meñ chhupe sadaf kā hameñ

hamārī zaat meñ bantā huā bhañvar degā

ḳhayāl-o-fikr ko terī na.ī qabā 'ahmar'

ye harf-o-saut nahīñ bas tirā hunar degā

har ek abr ke TukDe ko baal-o-par dega

shajar shajar ko ye mausam naya samar dega

wo meri qabr pe ek musht-e-KHak de aaya

jise tha dawa ke mangun to bahr-o-bar dega

nihaal-e-dard ko ashkon se sinchte rahna

ghamon ki dhup mein saya yahi shajar dega

pata shuur ki tah mein chhupe sadaf ka hamein

hamari zat mein banta hua bhanwar dega

KHayal-o-fikr ko teri nai qaba 'ahmar'

ye harf-o-saut nahin bas tera hunar dega