har ek ka hami wo musibat mein hua hai

har ek kā haamī vo musībat meñ huā hai

jis kā koī duniyā meñ nahīñ us kā ḳhudā hai

ḳhāmosh huuñ maiñ dekh ke raftār-e-zamāna

hairat sifat-e-dīda-e-naqsh-e-kaf-e-pā hai

achchhe ho to achchhe ho bure ho to bure ho

sunte ho jo āvāz vo gumbad kī sadā hai

ik umr huī dekhte nairang-e-zamāna

vo aḳhtar-e-qismat huuñ jo gardish meñ rahā hai

kyoñ ḳhūn-e-jigar khā.iye takmīl-e-hunar meñ

har nāqis-e-fan aaj amīrush-shu'arā hai

achchhā nahīñ hotā kabhī bīmār-e-mohabbat

ulfat vo maraz hai ki ajal jis kī davā hai

behtar hai ki baaz aa sitam-ījād o jafā se

ai charḳh bure kaam kā anjām burā hai

āsāñ nahīñ ai jaan safar mulk-e-adam kā

suntā huuñ ki dushvār bahut rāh-e-fanā hai

raushan hai jahāñ nuur se us parda-nashīñ ke

ḳhurshīd meñ zarra ruḳh-e-raushan kī ziyā hai

arbāb-e-karam phūlte phalte haiñ hamesha

sarsabz nihāl-e-karam-e-ahl-e-saḳhā hai

nāqis ke muāfiq hai ḳhilāf ahl-e-hunar ke

badlī huī 'raushan' ye zamāne kī havā hai

har ek ka hami wo musibat mein hua hai

jis ka koi duniya mein nahin us ka KHuda hai

KHamosh hun main dekh ke raftar-e-zamana

hairat sifat-e-dida-e-naqsh-e-kaf-e-pa hai

achchhe ho to achchhe ho bure ho to bure ho

sunte ho jo aawaz wo gumbad ki sada hai

ek umr hui dekhte nairang-e-zamana

wo aKHtar-e-qismat hun jo gardish mein raha hai

kyon KHun-e-jigar khaiye takmil-e-hunar mein

har naqis-e-fan aaj amirush-shu'ara hai

achchha nahin hota kabhi bimar-e-mohabbat

ulfat wo maraz hai ki ajal jis ki dawa hai

behtar hai ki baz aa sitam-ijad o jafa se

ai charKH bure kaam ka anjam bura hai

aasan nahin ai jaan safar mulk-e-adam ka

sunta hun ki dushwar bahut rah-e-fana hai

raushan hai jahan nur se us parda-nashin ke

KHurshid mein zarra ruKH-e-raushan ki ziya hai

arbab-e-karam phulte phalte hain hamesha

sarsabz nihaal-e-karam-e-ahl-e-saKHa hai

naqis ke muafiq hai KHilaf ahl-e-hunar ke

badli hui 'raushan' ye zamane ki hawa hai