har ek ka wo dard-e-jigar bhul gae hain

har ek kā vo dard-e-jigar bhuul ga.e haiñ

kyā apnī nigāhoñ kā asar bhuul ga.e haiñ

allāh re is be-ḳhudī-e-ishq kā aalam

dekhā hai kahīñ un ko magar bhuul ga.e haiñ

siina hai magar ishq ke anvār se ḳhālī

rahrav haiñ magar zād-e-safar bhuul ga.e haiñ

dekho to na.e daur kī āshufta-sarī ko

jo ahl-e-hunar the vo hunar bhuul ga.e haiñ

jab se gul-e-ḳhush-rang kī dekhī hai tabāhī

kaliyoñ ke tabassum kā asar bhuul ga.e haiñ

'shā.ir' dil-e-barbād hai masrūr hamārā

shāyad asar-e-shām-o-sahar bhuul ga.e haiñ

har ek ka wo dard-e-jigar bhul gae hain

kya apni nigahon ka asar bhul gae hain

allah re is be-KHudi-e-ishq ka aalam

dekha hai kahin un ko magar bhul gae hain

sina hai magar ishq ke anwar se KHali

rahraw hain magar zad-e-safar bhul gae hain

dekho to nae daur ki aashufta-sari ko

jo ahl-e-hunar the wo hunar bhul gae hain

jab se gul-e-KHush-rang ki dekhi hai tabahi

kaliyon ke tabassum ka asar bhul gae hain

'shair' dil-e-barbaad hai masrur hamara

shayad asar-e-sham-o-sahar bhul gae hain