har ek KHwab mein humne use sajaya bahut

har ek ḳhvāb meñ ham ne use sajāyā bahut

vo yaad aur bhī aaya jise bhulāyā bahut

ye aur baat ki ab yaad aa.e haiñ us ko

vafā ke naam pe jis ne hameñ satāyā bahut

haiñ surḳh-rū mire ash.ār to ta.ajjub kyā

ki ham ne ḳhuun se har lafz ko sajāyā bahut

na jaane kaise ḳhabar ho ga.ī zamāne ko

tumhārī yaad ko āñkhoñ se to chhupāyā bahut

ham intizār meñ jis ke sulagte rahte haiñ

vo jab bhī sāmne aaya to muskurāyā bahut

hamārī āñkhoñ ke kuuze meñ band thā dariyā

ye jī hī jāntā hai kis tarah dabāyā bahut

vo zulf raat kī parchhā.īñ thī magar ai 'raaj

ḳhayāl aaya hai us kā to jagmagāyā bahut

har ek KHwab mein hum ne use sajaya bahut

wo yaad aur bhi aaya jise bhulaya bahut

ye aur baat ki ab yaad aae hain us ko

wafa ke nam pe jis ne hamein sataya bahut

hain surKH-ru mere ashaar to tajjub kya

ki hum ne KHun se har lafz ko sajaya bahut

na jaane kaise KHabar ho gai zamane ko

tumhaari yaad ko aankhon se to chhupaya bahut

hum intizar mein jis ke sulagte rahte hain

wo jab bhi samne aaya to muskuraya bahut

hamari aankhon ke kuze mein band tha dariya

ye ji hi jaanta hai kis tarah dabaya bahut

wo zulf raat ki parchhain thi magar ai 'raj

KHayal aaya hai us ka to jagmagaya bahut