har ek lafz ko shaffaf aaina kar dun

har ek lafz ko shaffāf aa.ina kar duuñ

maiñ tere husn kā manzūm tarjuma kar duuñ

zabān-e-she’r meñ tashbīh isti’āroñ se

ba-har jamāl tujhe ik misāliya kar duuñ

ho she'r she'r meñ tere jamāl kā partav

ġhazal-ġhazal ko tarah-dār silsila kar duuñ

tire laboñ kā qasīda gulāb sun na sakeñ

chaman meñ terī satā.ish ko hādisa kar duuñ

bayāñ agar tirī añgḌā.iyoñ kā vasf karūñ

to shāḳh-e-gul kī nazākat ko vāhima kar duuñ

janam shu'ūr 'amal irtiqā bil-āḳhir maut

bayāñ hayāt kā lamhoñ meñ falsafa kar duuñ

qasam ḳhudā kī agar iḳhtiyār ho 'abrār'

har ik hasīn tasavvur ko vāqi'a kar duuñ

har ek lafz ko shaffaf aaina kar dun

main tere husn ka manzum tarjuma kar dun

zaban-e-she’r mein tashbih isti’aron se

ba-har jamal tujhe ek misaliya kar dun

ho she'r she'r mein tere jamal ka partaw

ghazal-ghazal ko tarah-dar silsila kar dun

tere labon ka qasida gulab sun na saken

chaman mein teri sataish ko hadisa kar dun

bayan agar teri angDaiyon ka wasf karun

to shaKH-e-gul ki nazakat ko wahima kar dun

janam shu'ur 'amal irtiqa bil-aKHir maut

bayan hayat ka lamhon mein falsafa kar dun

qasam KHuda ki agar iKHtiyar ho 'abrar'

har ek hasin tasawwur ko waqi'a kar dun