har ek raat mein apna hisab kar ke mujhe

har ek raat meñ apnā hisāb kar ke mujhe

sahar ko chhoḌ diyā āftāb kar ke mujhe

mire junūn ko pahuñchā diyā hai manzil tak

safar ke shauq ne ḳhāna-ḳharāb kar ke mujhe

zarā sī der meñ vo bulbule bhī phuuT ga.e

jinheñ vajūd milā ġharq-e-āb kar ke mujhe

usī ko din ke ujāle meñ ā.ūñgā maiñ nazar

tamām raat jo dekhegā ḳhvāb kar ke mujhe

jagah jagah pe muḌe haiñ ka.ī varaq mere

kisī ne roz paḌhā thā kitāb kar ke mujhe

banā rahā hai agar tū mujhe to dhyān rahe

tujhe banānā paḌegā ḳharāb kar ke mujhe

maiñ ik nasha huuñ use paḌ ga.ī hai lat merī

hayāt piine lagī hai sharāb kar ke mujhe

mirī shanāḳht hai ahl-e-suḳhan meñ bas itnī

kiyā gayā hai alag intiḳhāb kar ke mujhe

har ek raat mein apna hisab kar ke mujhe

sahar ko chhoD diya aaftab kar ke mujhe

mere junun ko pahuncha diya hai manzil tak

safar ke shauq ne KHana-KHarab kar ke mujhe

zara si der mein wo bulbule bhi phuT gae

jinhen wajud mila gharq-e-ab kar ke mujhe

usi ko din ke ujale mein aaunga main nazar

tamam raat jo dekhega KHwab kar ke mujhe

jagah jagah pe muDe hain kai waraq mere

kisi ne roz paDha tha kitab kar ke mujhe

bana raha hai agar tu mujhe to dhyan rahe

tujhe banana paDega KHarab kar ke mujhe

main ek nasha hun use paD gai hai lat meri

hayat pine lagi hai sharab kar ke mujhe

meri shanaKHt hai ahl-e-suKHan mein bas itni

kiya gaya hai alag intiKHab kar ke mujhe