har ek se rone dhone se ai dida-e-purnam kya hoga

har ek se rone dhone se ai dīda-e-purnam kyā hogā

jo dard diyā hai yāroñ ne vo dard bhalā kam kyā hogā

kuchh zikr na rū-e-tābāñ kā kuchh baat na zulf-e-barham kī

ye ġham kā hamāre afsāna ab itnā bhī mub.ham kyā hogā

phir yaad tirī naġhma ban kar lauTe na matā-e-dard kahīñ

phir ġham kī añdherī rātoñ meñ ab chheḌ ke sargam kyā hogā

tū biite dinoñ kī yaad na kar jis tarah bhī biite biit ga.e

jo din ki ab aane vaale haiñ dekh un kā cham-o-ḳham kyā hogā

rauñde hue phūloñ kī hālat maalī ko bhalā ma.alūm na ho

khilne pe bhī khul kar hans na sake murjhā.e to mātam kyā hogā

ik roz 'zuhūr'-e-mai-kash bhī mahfil se tirī uTh jā.egā

shīrāza-e-mai-ḳhāna lekin saaqī tirā barham kyā hogā

har ek se rone dhone se ai dida-e-purnam kya hoga

jo dard diya hai yaron ne wo dard bhala kam kya hoga

kuchh zikr na ru-e-taban ka kuchh baat na zulf-e-barham ki

ye gham ka hamare afsana ab itna bhi mubham kya hoga

phir yaad teri naghma ban kar lauTe na mata-e-dard kahin

phir gham ki andheri raaton mein ab chheD ke sargam kya hoga

tu bite dinon ki yaad na kar jis tarah bhi bite bit gae

jo din ki ab aane wale hain dekh un ka cham-o-KHam kya hoga

raunde hue phulon ki haalat mali ko bhala malum na ho

khilne pe bhi khul kar hans na sake murjhae to matam kya hoga

ek roz 'zuhur'-e-mai-kash bhi mahfil se teri uTh jaega

shiraaza-e-mai-KHana lekin saqi tera barham kya hoga