har ek shai mein nihan ruh-e-justuju tum ho

har ek shai meñ nihāñ rūh-e-justujū tum ho

hamāre dard bhare dil kī aarzū tum ho

mire junūñ ne garebāñ ko chaak kar ke unheñ

kahā ishāroñ meñ sāmān-e-sad-rafū tum ho

jidhar nigāh ga.ī tum udhar nazar aa.e

tumhāre jalve haiñ har shai meñ chaar sū tum ho

kahegī laakh meñ merī nigāh aalam meñ

zamāne bhar ke hasīnoñ meñ ḳhūb-rū tum ho

chaTak ke kahte haiñ tum se ye ġhuncha-hā-e-chaman

hamārā husn-e-dil-āvez rang-o-bū tum ho

chale ho sāmnā us barq-vash kā karne ko

sañbhal ke honā jo 'manzūr' rū-ba-rū tum ho

har ek shai mein nihan ruh-e-justuju tum ho

hamare dard bhare dil ki aarzu tum ho

mere junun ne gareban ko chaak kar ke unhen

kaha ishaaron mein saman-e-sad-rafu tum ho

jidhar nigah gai tum udhar nazar aae

tumhaare jalwe hain har shai mein chaar su tum ho

kahegi lakh mein meri nigah aalam mein

zamane bhar ke hasinon mein KHub-ru tum ho

chaTak ke kahte hain tum se ye ghuncha-ha-e-chaman

hamara husn-e-dil-awez rang-o-bu tum ho

chale ho samna us barq-wash ka karne ko

sanbhal ke hona jo 'manzur' ru-ba-ru tum ho