har ek shaKHs ko sara hisab dena hai

har ek shaḳhs ko saarā hisāb denā hai

savāl uThne lage to javāb denā hai

ye nashsha tum ko pilānā paḌegā āñkhoñ se

ki jaam bhar ke agarche sharāb denā hai

sitam-shi.ār ko ādāb-e-qatl aate haiñ

abhī nazar kī kaTārī ko aab denā hai

lahūluhān khaḌā sochtā huuñ kāñToñ meñ

ye kaisā shauq hai kis ko gulāb denā hai

badan pighalne tak āġhosh meñ raho merī

zarā sā ḳhud ko nahīñ pech-o-tāb denā hai

yahī sulūk kiyā jā rahā hai barsoñ se

ki un ko shahd hameñ zahr-e-nāb denā hai

bas is nizām ko tabdīl tum karo 'ishrat'

nayā zamāna nayā inqalāb denā hai

har ek shaKHs ko sara hisab dena hai

sawal uThne lage to jawab dena hai

ye nashsha tum ko pilana paDega aankhon se

ki jam bhar ke agarche sharab dena hai

sitam-shiar ko aadab-e-qatl aate hain

abhi nazar ki kaTari ko aab dena hai

lahuluhan khaDa sochta hun kanTon mein

ye kaisa shauq hai kis ko gulab dena hai

badan pighalne tak aaghosh mein raho meri

zara sa KHud ko nahin pech-o-tab dena hai

yahi suluk kiya ja raha hai barson se

ki un ko shahd hamein zahr-e-nab dena hai

bas is nizam ko tabdil tum karo 'ishrat'

naya zamana naya inqalab dena hai