har ek shaKHs pareshan-o-darba-dar sa lage

har ek shaḳhs pareshān-o-darba-dar sā lage

ye shahr mujh ko to yaaro koī bhañvar sā lage

ab us ke tarz-e-tajāhul ko kyā kahe koī

vo be-ḳhabar to nahīñ phir bhī be-ḳhabar sā lage

har ek ġham ko ḳhushī kī tarah baratnā hai

ye daur vo hai ki jiinā bhī ik hunar sā lage

nashāt-e-sohbat-e-rindāñ bahut ġhanīmat hai

ki lamha lamha pur-āshob-o-pur-ḳhatar sā lage

kise ḳhabar hai ki duniyā kā hashr kyā hogā

kabhī kabhī to mujhe aadmī se Dar sā lage

vo tund vaqt kī rau hai ki paañv Tik na sakeñ

har aadmī koī ukhḌā huā shajar sā lage

jahān-e-nau ke mukammal siñgār kī ḳhātir

sadī sadī kā zamāna bhī muḳhtasar sā lage

har ek shaKHs pareshan-o-darba-dar sa lage

ye shahr mujh ko to yaro koi bhanwar sa lage

ab us ke tarz-e-tajahul ko kya kahe koi

wo be-KHabar to nahin phir bhi be-KHabar sa lage

har ek gham ko KHushi ki tarah baratna hai

ye daur wo hai ki jina bhi ek hunar sa lage

nashat-e-sohbat-e-rindan bahut ghanimat hai

ki lamha lamha pur-ashob-o-pur-KHatar sa lage

kise KHabar hai ki duniya ka hashr kya hoga

kabhi kabhi to mujhe aadmi se Dar sa lage

wo tund waqt ki rau hai ki panw Tik na saken

har aadmi koi ukhDa hua shajar sa lage

jahan-e-nau ke mukammal singar ki KHatir

sadi sadi ka zamana bhi muKHtasar sa lage