har ek sher mein dil ka qarar rakh dena

har ek sher meñ dil kā qarār rakh denā

ġhazal meñ apnī suḳhan kā vaqār rakh denā

vo jis ne pyaar se duniyā pe fat.h paa.ī thī

to us ke jaisā hī lahje meñ pyaar rakh denā

bhaTak na jaa.e kahīñ kārvān-e-ahl-e-ḳhirad

koī charāġh sar-e-rahguzār rakh denā

ḳhizāñ ke aane se pahle chaman ke matavālo

guloñ ke ruḳh pe lahū kī phuvār rakh denā

kabhī to yaad karegā zamāna paḌh ke tujhe

varaq varaq pe fasāne hazār rakh denā

koī to baat zamāne ke dil meñ utregī

to sab ke sāmne haq kī pukār rakh denā

yahīñ se qāfila guzregā merī yādoñ kā

yahīñ kahīñ pe mirā intizār rakh denā

dayār-e-dil se guzar jis ghaḌī bhī ho 'dildār'

mile na phuul to ashkoñ ke haar rakh denā

har ek sher mein dil ka qarar rakh dena

ghazal mein apni suKHan ka waqar rakh dena

wo jis ne pyar se duniya pe fath pai thi

to us ke jaisa hi lahje mein pyar rakh dena

bhaTak na jae kahin karwan-e-ahl-e-KHirad

koi charagh sar-e-rahguzar rakh dena

KHizan ke aane se pahle chaman ke matawalo

gulon ke ruKH pe lahu ki phuwar rakh dena

kabhi to yaad karega zamana paDh ke tujhe

waraq waraq pe fasane hazar rakh dena

koi to baat zamane ke dil mein utregi

to sab ke samne haq ki pukar rakh dena

yahin se qafila guzrega meri yaadon ka

yahin kahin pe mera intizar rakh dena

dayar-e-dil se guzar jis ghaDi bhi ho 'dildar'

mile na phul to ashkon ke haar rakh dena