har ek zist ka lamha bhale nihaal na ho

har ek ziist kā lamha bhale nihāl na ho

koī to duur ho aisā ki jo muhāl na ho

duā ye kar na koī zindagī meñ aisā mile

jo ham-safar to rahe aur ham-ḳhayāl na ho

le itnā raḳht-e-safar ki safar bhī kaT jaa.e

aur is kā bojh tire vāste vabāl na ho

safar meñ itnī hī raftār rakh ki āḳhir-kār

pahuñch ke tū sar-e-manzil kahīñ niDhāl na ho

amal vo kar ki nadāmat na jis pe ho tujh ko

vo baat kah ki tujhe baa'd meñ malāl na ho

ḳhudā maqām agar de to bas vo itnā hī

ki jis ke baa'd muqaddar meñ phir zavāl na ho

har ek zist ka lamha bhale nihaal na ho

koi to dur ho aisa ki jo muhaal na ho

dua ye kar na koi zindagi mein aisa mile

jo ham-safar to rahe aur ham-KHayal na ho

le itna raKHt-e-safar ki safar bhi kaT jae

aur is ka bojh tere waste wabaal na ho

safar mein itni hi raftar rakh ki aaKHir-kar

pahunch ke tu sar-e-manzil kahin niDhaal na ho

amal wo kar ki nadamat na jis pe ho tujh ko

wo baat kah ki tujhe ba'd mein malal na ho

KHuda maqam agar de to bas wo itna hi

ki jis ke ba'd muqaddar mein phir zawal na ho