har gam pe hairat ka naya bab khula hai

har gaam pe hairat kā nayā baab khulā hai

ta.abīr pareshān hai kyā ḳhvāb khulā hai

ojhal hue āñkhoñ se to pūchhā na kisī ne

andāz-e-ruḳh-e-pursish-e-ahbāb khulā hai

ham log mohabbat ke ravādār na hote

tāḳhīr se ham par dil-e-betāb khulā hai

hoñToñ pe lagā qufl-e-ḳhamoshī nahīñ TuuTā

sunte haiñ yad-e-mausam-e-ījāb khulā hai

bastī se guzartā hai to bastī nahīñ rahtī

kin āñkhoñ se ye chashma-e-sailāb khulā hai

pahchān ke siine se lagāyā use ham ne

qātil kī tarah chehra-e-girdāb khulā hai

lagtā hai chhalak jā.egā ab jām-e-tamannā

is baar jo paimāna-e-a.asāb khulā hai

jaisā bhī hai vaqt ab na rukeñge 'alī-yāsir'

chalte haiñ ki darvāza-e-mahtāb khulā hai

har gam pe hairat ka naya bab khula hai

tabir pareshan hai kya KHwab khula hai

ojhal hue aankhon se to puchha na kisi ne

andaz-e-ruKH-e-pursish-e-ahbab khula hai

hum log mohabbat ke rawadar na hote

taKHir se hum par dil-e-betab khula hai

honTon pe laga qufl-e-KHamoshi nahin TuTa

sunte hain yad-e-mausam-e-ijab khula hai

basti se guzarta hai to basti nahin rahti

kin aankhon se ye chashma-e-sailab khula hai

pahchan ke sine se lagaya use hum ne

qatil ki tarah chehra-e-girdab khula hai

lagta hai chhalak jaega ab jam-e-tamanna

is bar jo paimana-e-asab khula hai

jaisa bhi hai waqt ab na rukenge 'ali-yasir'

chalte hain ki darwaza-e-mahtab khula hai